Լեոնիդ Ենգիբարյանի անվան «PANTOMIME FEST» մնջախաղի միջազգային 3-րդ փառատոնի շրջանակներում հանդես են գալիս անհատ մնջախաղացներ և մնջախաղի թատերախմբեր. Մատեո Չոնինին (Իտալիա), Մակոտո Ինոուեն (Ճապոնիա), Գլեն Խավիերը (Դանիա), Փոլանդ Թիեթր թատերախումբը (Լեհաստան), Սերգեյ Չերվյակովը (Ղազախստան), ինչպես նաև Հայաստանի 4 թատրոններ: Փառատոնի հատուկ հյուրն է Սանկտ Պետերբուրգի թատերական արվեստ ակադեմիայի պրոֆեսոր Ելենա Մարկովան:
Ամենախոշոր վարպետության դասն էլ հենց նա է անցկացնելու:

Այս տարի փառատոնի ամենակարևոր իրադարձությունը Լեոնիդ Ենգիբարյանի բրոնզաձույլ արձանի տեղադրումն է Ծաղկաձորի կենտրոնական հրապարակում: Արձանի բացմանն ընդառաջ կկազմակերպվի մեծ ֆլեշ-մոբ, որի ընթացքում վարպետության դասընթացների մասնակիցները միասին կփորձեն կատարել մեծ ծաղրածուի ամենահայտնի շարժումները:

Նշենք, որ մնջախաղի փառատոնը հիմնադրվել է 2008 թվականին և Ծաղկաձորում անցկացվում է երկու տարին մեկ անգամ: Իսկ Լեոնիդ Ենգիբարյանի անունը փառատոնը կրում է 2010 թվականից:

Փառատոնը կազմակերպում են ՀՀ Մշակույթի նախարարությունը, Երևանի մնջախաղի պետական թատրոնը, Ազգային թատերական ստեղծագործական միավորումը և Ծաղկաձորի քաղաքապետարանը:

Լուսինե Սարգսյան